Форум мусіць паспрыяць стварэнню трэцяй сілы ў дачыненнях Беларусі з Захадам (фота)

19 верасня ў сябдзібе Партыі БНФ адбыўся сход па вылучэнню дэлегатаў на Беларускі Еўрапейскі Форум ад жыхароў Малінаўкі.

З вітальным словам выступіў арганізатар сходу Аляксей Кавалец. Ён нагадаў умовы, пры якіх Еўразвяз летась ініцыяваў праграму Усходняга партнёрства.

Намеснік Старшыні Руху "За Свабоду" Юрась Губарэвіч распавёў пра пэўныя пазітыўныя зрухі ў палітычным жыцці краіны.  Пагроза страты суверэнітэту з боку Расіі і агульная  сітуацыя ў эканоміцы прымушае ўлады ісці насустрач патрабаваннем Еўразвязу. На думку Юрася Губарэвіча, Беларускі Еўрапейскі Форум мусіць паспрыяць стварэнню ўплывовай трэцяй (дэмакратычнай) сілы ў беларуска-еўразвязаўскіх дачыненнях, дзе, на дадзены момант, Беларусь прадстаўлена пераважна афіцыйнымі ўладамі.

Сустаршыня БХД Павал Севярынец распавёў пра мэты і вынікі Беларускага Еўрапейскага Форуму, якіх можна дамагчыся. Палітык таксама падзяліўся ўражаннямі ад сустрэчы з прадстаўнікамі ўраду Швецыі 14 верасня. Паводле яго слоў, прэм'ер Швецыі, кіраўнік МЗС, старш ў адзін голас заяўляюць: "Пастараемся разам змяніць сітуацыю. Мы запрашаем яго, каб дапамагчы вам". Пытанні рэпрэсій і зніклых палітыкаў заўсёды пад увагай еўрапейскіх палітыкаў. Павал Севярынец лічыць, што дэмакратычныя сілы павінны дапамагчы Еўразвязу ўплываць на рэжым.

- Мяняецца свет, мяняецца рэжым. Мы павінны падштурхнуць гэтыя змены. Сабрацца, каб вызначыцца, якую Беларусь мы хочам бачыць. Беларусы мусяць мець свой голас, каб дыялог адбываўся не толькі паміж рэжымам і Еўропай. Беларуская хрысціянская дэмакратыя, якая імкнецца прапанаваць маральную альтэрнатыву рэжыму, актыўна ўдзельнічае ў падрыхтоўцы Форума, − заявіў Павал Севярынец.

Выступіў таксама адзін з удзельнікаў сходу. Ён акцэнтаваў увагу на неабходнасці вяртання прыватнай уласнасці на зямлю, змагання за рэальныя выбары, развіцця самакіравання.