На Ясенінскім сходзе даабралі 7 чалавек (фота)

На сустрэчы прысутнічалі дэмакратычныя актывісты і незаангажаваныя палітычнай дзейнасцю прыхільнікі еўрапейскай інтэграцыі, усяго каля 16 чалавек.

Старшынём сходу абралі Алега Лук'яненка, сакратаркай − Наталлью Красоўскую.

Перад прысутнымі выступілі дарадца старшыні Руху "За Свабоду" Алесь Лагвінец і сябра Рады Руху "За Свабоду" Аляксей Кавалец.

− Палітыка Еўразвязу памянялася пасля вайны ў Грузіі, пасля паразы дэмакратаў у 2006-м.
Зараз імгненныя станоўчыя перамены на жаль малаверагодныя. Мы хочам зблізіць Беларусь з Еўрапейскім Звязам. Пашыраць праеўрапейскія настроі ў грамадстве, зрабіць так, каб Захад лічыўся з нашым меркаваннем, а не толькі з пунктам погляду афіцыйных ўладаў. Ад крызісу, ад дэфолту ў Беларусі, калі б нам не дапамагалі заходнееўрапейскія краіны, скарысталася б Расія, − лічыць Алесь Лагвінец.

На думку Алеся Лагвінца, эканамічнае рэфармаванне таксама вымагае новых тэхналогій, якія можа даць толькі цывілізаваная Еўропа. Праеўрапейскія дэмакратычныя сілы хочуць, каб большасць беларусаў бачыла выгоды ад збліжэння з Еўропай.


Аляксей Кавалец адзначыў, што наша краіна гістарычна еўрапейская, а сённяшнія ўлады чужыя нашай ментальнасці.

− Мы павінны уплываць на нашае жыццё, нашу уладу праз свабодныя выбары. Мы павінны дыверсіфікаваць крыніцы паставак энерганосьбітаў, бо зараз моцна залежым ад Расіі, − мяркуе Аляксей Кавалец.

Паводле Аляксея Кавальца, на Форуме будуць прыняты стратэгія і план дзеянняў на бліжэйшы час. Прадстаўнічае мерапрыемства прыхільнікаў еўраінтэграцыі мусіць паказаць, што ў краіне ёсць грамадзянская супольнасць, якая будзе працягваць палітыку збліжэння з краінамі ЕЗ, калі зменіцца кан'юктура і ўлады павернуцца на Усход.

Аляксей Кавалец нагадаў, што на Форум запрошана вялікая колькасць уплывовых замежных палітыкаў і дыпламатаў.

− Нам вельмі важна, каб паварот у бок Еўропы быў падтрыманы знізу. На гэта і нацэлены Форум.  Грошы, якія будуць ісці ад Еўропы, накіраваныя на падтрымку канкрэтных праэктаў і праграм па мадэрнізацыі, − дадаў Алесь Лагвінец.

Прысутныя задавалі шмат пытанняў пра перспектывы еўраінтэграыі, правядзенне Форума, узаемадачыненні з Расіяй.

Шляхам галасавання дэлегатамі на Беларускі Еўрапейскі Форум выбрана сем чалавек. На першым сходзе было вылучана тры чалавекі.